ಧರ್ಮ ದೈವ ಕೊರಗಜ್ಜನ ಕಥೆ ಪ್ರತಿಯೊರಿಯೆಲ ಓದೊಡೆ ಆಯಿನ

ಧರ್ಮ ದೈವ ಕೊರಗಜ್ಜನ ಕಥೆ:

ಕೊರಗಜ್ಜೆ ಪಂಡ ದಲಿತ ಸಮುದಾಯದಕಲ್ನ ಕುಲದೈವ ಪಂದೇ ಪನೊಲಿ. ಕೊರಗಜ್ಜನ್ ತೆನ್ಕಾಯಿ ರಾಜ್ಯೊಡ್ ಕೊರಗಜ್ಜೆ ಪಂದ್, ಬಡಕಾಯಿ ರಾಜ್ಯೊಡ್ ನೀಚ ಪನ್ಪಿನ ಪುರಾಪುಡ್ ಆರಾಧನೆ ಮಲ್ಪುವೆರ್.

ಪಣಂಬೂರುಡು ಓಡಿ ಬೊಕ ಅಚ್ಚುಮೈರೆದಿ ಪನ್ಪಿನ ಕೊರಗ ದಂಪತಿಲೆಗ್ ಒಂಜಿ ಆನ್ ಬಾಲೆ ಪುಟ್ಟುಂಡ್ಗೆ ಅಯಗ್ ತನಿಯ ಪನ್ಪಿನ ಪುದರ್ನ್ ದೀಪೆರ್ಗೆ.

ತನಿಯೆ ಮುಪ್ಪ ದಿನತ ಬಾಲೆ ಉಪ್ಪನಗ ಅಯನ ಅಪ್ಪೆಲ ಅಮ್ಮೆಲ ತೀರ್ ಪೊಪೆರ್ಗೆ ಏಲ್ ಕೊಪ್ಪದ ದೊಲ್ ಬೂರ್ದ್ ಪೊವನಗ. ತನಿಯೆ ಅನಾಥೆ ಆದ್ ಬುಲ್ತೊಂದು ಉಪ್ಪನಗ ಬೈದೆರೆ ಜಾತಿಗ್ ಶೇರಿನ ಮೈರಕ್ಕ ಬೈದೆದಿ ಬೊಕ ಅರ್ನ ಮಗೆ ಚೆನ್ನಯ್ಯನ್ ತೂಪೆಗೆ ತನಿಯೆ.

ಅರಡ ಅಮ್ಮ ಯೆಂಕ್ ಒಂಜಿ ಕುಂಟು ಕೊರ್ಲೆ ಪಂದ್ ಕೇನ್ನಗ ಆರ್ ತನ್ನ ಕುಜಲ್ಗ್ ಕಟುದಿನ ಕುಂಟುನೆ ಗೆತ್ತುದ್ ಬಾಲೆಗ್ ಕೊರ್ದು ಬಾಲೆನ್ ತನ್ನ ಒಟ್ಟುಗು ಲೆಸೊಂದು ಪೊಪೆರ್ಗೆ. ಮೈರಕ್ಕೆ ಕಸುಬುಡ್ ಕಲಿನ್ ಮಾರುನಾರ್. ಇಂಚ ಉಪ್ಪನಗ ತನಿಯಡ ಒಂಜಿ ದಿನ ತಾನ್ ಪತೊಂದು ಬೈದಿನ ಕಲಿನ್ ಮಂಡೆಗ್ ದಿಂಜವೆರೆಗ್ ಪನ್ಪಿರ್ಗೆ. ತನಿಯೆ ಕಲಿನ್ ಜಿಂಜವೆಗೆ. ಆಂಡಾ ತನಿಯೆ ದಿಂಜಾಯಿನ ಕಲಿ ಏಲ್ ರಾತ್ರಿ ಏಲ್ ಪಗೆಲ್ ಕರಿಂಡಲ ಕಾಲಿ ಆಪುಜಿಗೆ.

ಅಕೇರಿಗ್ ಮೈರಕ್ಕೆ ಕದ್ರಿದ ಮಂಜುನಾಥ ದೇವೆರೆಗ್ ಕಲಿ ಪೂರ ಕಾಲಿಯಾದ್ ಪೊಂಡ ಕಂಚಿದ ಪೊಡಕೆನ್ ಒಪ್ಪಾವೆ ಪಂದ್ ಪರಕೆ ಪನ್ಪೆರ್ಗೆ. ಅದಗ ಕಲಿ ಪೂರಾ ಕಾಲಿಯಾದ್ ಪೊಪುಂಡ್ಗೆ. ಕಲಿ ಕಾಲಿಯಾನ ಖುಸಿಟ್ ತನಿಯಗ್ ಒಂಜಿ ಪಾಲೆದ ಕೊರಂಬುನು ಮಲ್ತು ಕೊರ್ಪೆರ್ಗೆ .

ತನಿಯೆ ಕಾಲದ ಕಟ್ಟ್ ಪ್ರಕಾರ ಬಾಲ್ಯ ಬುಡ್ದು ಜವನೆ ಆನಗ ಕದ್ರಿಗ್ ಪಂತಿನ ಪರಕೆದ ಪ್ರಕಾರ ಮೈರಕ್ಕ ಬೈದೆದಿ ಕಂಚಿದ ಪೊಡಕೆನ್ ಮಲ್ಪವೆರ್ ಅವೆನ್ ದೆರ್ಪೆರೆಗ್ ಏಲ್ ಜನ ಬೊಡ್ಗೆ. ಏಲ್ ಜನತ ವನಸ್,ಕಲಿ,ಬಚ್ಚಿರೆನ್ ಒರಿಯೆ ತಿನ್ಪೆಗೆ ತನಿಯೆ ಏಲ್ ಜನ ತುಂಬುನ ಪರಕೆನ್ ಒರಿಯೆ ತುಂಬೊಂದು ಪೊದ್ ಕದ್ರಿದ ದೇವಸ್ಥಾನದ ಪಿದಯಿಡ್ ಉಂತುದು ಪರಕೆನ್ ಉಲಯಿ ದಕ್ಕುವೆಗೆ ಮಾತೆರೆಲ ಉಂದೆನ್ ತೂದ್ ಆಚ್ಚೆರ ಆಪುಂಡ್ಗೆ ತನಿಯೆ ಒರಿ ಅಸಮಾನ್ಯ ಶಕ್ತಿ ಪಂದ್ ಪೂರಕಲೆಗ್ಲ ತೆರಿಯುಂಡ್ಗೆ.

ದೇವಸ್ಥಾನದ ಪಿದಯಿಡ್ ಮಾಪಳ ಪರುಂದ್ ಉಪ್ಪುಂಡ್ಗೆ ತನ್ನ ಬುಡೆದಿಗ್ ಪ್ರೀತಿಪಂದ್ ಅವೆನ್ ಕೊಯ್ಯನಗ ಮಾಯ ಆದ್ ಮಾಯಕದ ಕಲ್ಲಾದ್ ಅಲ್ಪ ನೆಲೆಯಾದ್ ತುಳುನಾಡ್ದ ಕಾರ್ನಿಕದ ಶಕ್ತಿಯಾದ್ ಮೆರೆಯೊಂದು ಬರ್ಪೆಗೆ ಪಂದ್ ಒಂಜಿ ಪಾಡ್ದನ ಪನ್ಪುಂಡು.

ಕುಡೊಂಜಿ ಪಾಡ್ದನದ ಪ್ರಕಾರ ಮಾಪಳ ಪರುಂದ್ನ್ ಕೊಯ್ಯನಗ ಬ್ರಾಣೆರ್ ಕಡ್ತುದ್ ಕೆರಿಯೆರ್ ಬೊಕ್ಕ ಅಕಲೆಗ್ ದೊಷ ತೊಜಿದ್ ಕೊರಗಜ್ಜ ಪನ್ಪಿನ ಪುದರ್ಡ್ ನಂಬುವೆರ್ಗೆ. ಸುರು ಸುರುಕು ಕೊರಗೆರ್ನಗಲೆಗ್ ಮಾತ್ರ ದೈವ ಆದ್ ಇತ್ತಿನ ಕೊರಗಜ್ಜೆ ಇನಿ ಕೊಡೆದ ದಿನೊಟ್ ಜಾತಿ, ಮತ ಭೇದ ಉಪ್ಪಂದೆ ಮಾತೆರ್ಲ ನಂಬುನ, ಅಯ್ಯ ಪಂದ್ ಲೆತ್ತುಂಡ ಓ ಕೊನೊಂದ್ ಪಾರವುನ ಕಾರ್ನಿಕದ ಶಕ್ತಿಯಾದ್ ಧರ್ಮದೈವ ಕೊರಗಜ್ಜೆ ಮೆರೆಯೊಂದು ಬರ್ಪೆಗೆ. ಕಥೆನ್ ಓದಿನ ಮಾತೆರೆಗ್ಲ ಧರ್ಮದೈವ ಕೊರಗಜ್ಜೆ ಎಡ್ಡೆ ಮಲ್ಪಡ್.

...